Im Laufe der drei Tage sind in den Restaurants und zahlreichen Clique-Kellern jede Menge «Schnitzelbänkler» unterwegs, die die aktuelle Politik mit scharfzüngigen Versen kommentieren. Ein Topthema sind in diesem Jahr natürlich die Wahlen in den USA und der neue US-Präsident Donald Trump.
Bangg Rott
Ych hätt e Värs vom Trump bereit!
Aber s gilt «Inländervorrang light!»,
Wenn mir dää jetze wurde singe,
mien mir ain vom Glarner bringe!
D'Syydiaane
Lang no de Waale het uns d Froog
immer wiider gwäält:
Sind die wiirgglig so beschränggt
oder händ die sich verwäält?
So vyyl Dummhait muess jo
naime syni Gränze haa:
Nach unde isch es Mexiko,
nach oobe Kanada.
Käller-Assle
Noo de Waale z Amerika
Lytet dr Gilbert Gress em Trump grad aa:
«Ych gratulier und mir duet schyyne
dy Coiffeur isch dr glyych wie myne»
s Bangg-Ghaimnis
S'hänn Teil Parteie mit der Mitgliedszahl Probleem.
Es fählt an Neu-Mitglieder – dr Mensch isch halt bequeem.
S'wott sich bald niemmer meh politisch engagiere.
Drum isch es schwierig, neui Members z'rekrutiere.
Ei Leesigs-Aasatz vom Problem, das het me kirzlig gseh:
Es macht der Darbellay bym Fremdgoh Nochwuggs für sy CVP.
Peperoni
Isch äggscht d Frau Sommaruga do?
Y hätt e Värs iber Asylante ... und so.
Nai nit diräggt ain iber sii – y wottere jo nit schlächts.
Und falls si schnäll wett uusegoo ... s WC wäär hinde rächts.
d'Ständerlampe
Mi Frau het sich am Morge aaglegt: Los i muess jetz goo
Fyrs z'Mittag sott im Kyehlschrangg no e Büggse Ravioli stoo
Zem z'Vieri hätts non e Schwartemage und Suure Moscht
I sott z'Obe wiider dehaim si, i muess nur schnäll uf d'Poscht
Gasladärne
Das Glaid vom Doris, do am Gotthard Tunnelfescht.
Wirft scho no Frooge uff bi allne gladne Gäscht.
Denn vor der Bahnfahrt mit em Hollande und em Renzi
syg dä bundesrötlig Lumpe schynts no ganz gsi.
